Category Archives: Poetry

” WOH “

Standard

Woh shaid meri samajh se bahar tha

mere khwabon ko jis ne jagaya tha

safar zeest ka sehal ho gaya tha

jab qadam uske qadam ke saath milaya tha

zamane ko uski ada bhai nahi

chaman jis tarah usne sajaya tha

jal na saka phir kabhi zindagi bhar

na ummeedi ne jo chiragh bujhaya tha

jana hi tha sab chorr ker aasman ki taraf

zameen per lamhon ke liye kioon utar ke aaya tha?

 

Dec 14th, 2011

nazm: Tum ne Kitab aur Shamsheer ki qasm khai thi..!!

Standard

.. ke tum is arz e Pak ki hifazat karo ge

marr mito ge agar koi chasm e budd iski janib uthi

bhula ker woh waaday woh qasmein tamam

tum ne apne hi haathon se iski hurmat ganwa di

 

khamosh hai sipah, saktay mein qom hai

be asar ho gayeen dastaan e shuja’at

sukoot aisa ke hai sheher e khamoshan ka guman

gehrey panion mein magar shorish e toofan hai

Read the rest of this entry

nazm: tuu sochta ho ga…!!

Standard

aye meri qom ke bachchay tuu sochta ho ga..!!

kitna farq hai kisi ke kehne aur honay mein

jama’at mein ustani  ne ek din kaha tha

ek sha’ir ka khwaab hai ye khitta e zameen

per kitna bhayanak ho ga woh khwaab

ke jiski yeh taa’beer hai.. tuu sochta ho ga..!!

 

kia yehi woh watan hai jiski tareekh

Bhatti o Abbasi o Tufail ne khoon se likhi

kahan gayee woh azmat e rafta jiski qasm kha ker

dushman ki goli jawano ne seenay per roki

kioon neend aa gaye josheelay jazbon ko

kioon so gaye woh sarhad per.. tuu sochta ho ga..!!

Read the rest of this entry

nazm: Faaslay

Standard

jab zindagi ke shajar ko muhabbat ka pani nahi milta

uski khushk  tehnian phoolon ko taras jati hain

ghalatfehmion aur buddgumanion ke kaantay

chhoonay walon ka lohu  nichorr letay hain

woh jin ke aanay se aati hai chaman mein fasl e bahaar

sehraa ki jhulsi hui aandhi ki tarah guzar jatay hain

ajnabiat, lagawat ki jagah le leti hai

umar bhar ki chahten nafraton mein badal jaati hain

muhabbaton ki qurbaten bay aasra ho ker

laa ta’aluqqi ke faslon ko taa hadd e nazar ker deti hain

 

April 15, 2011

nazm: mann ka qaidi

Standard

kehte hain har insaan mein ek bachcha chupa hota hai… mere ander ka yeh bachcha bohat ‘uchchloo’ hai !!

umar ke iss hissay mein jab waqt ka pehra lagta hai

mann ka qaidi bachcha machalnay bikharnay lagta hai

barsaat ke mausam mein jab koel kookne lagti hai

aur mitti ki soondhi khushbu se manzar mehakne lagta hai

jab duur paharron per qos e qazah lehrati hai

torr ker zanjeeren ye qaidi  mann se farar ho jata hai

phir kahan ka pehra, kaisa qafas, kaisee samaj deevarain

kaise pakrren iss qaidi ko woh bhag chuka hota hai

APRIL, 2011