Monthly Archives: November 2010

nazm:’ TERI HOON ‘

Standard

pal pal ginte beet gaya apna jeevan saara

tasbeeh ke danay khatam huay. ruk gaya shumara

khel tamasha, likhna parrhna sab hua tamam

bohat dheel di Qudrat ne, aa gaya harkara

kabhi na kabhi tu rukni thee gardish taqdeer ki

kab tak chalay ga, thak ker rukay ga ik din to sayyara

sadaayen maidan mein sab ki sunay ga Munsif e Akhir

mein bhi hoon usee ke falak ka toota hua ik tara

baar e isyaan ser per lada hai, jhuka hua hai ser

ummeed hai phir bhi nazr e karam ki, teri hoon akhir Khuda ra

23rd november,2010

NAZM: ‘……. KI YAAD MEIN ‘

Standard

mere chaman mein uski hansi ab bhi sunai deti hai

raat ke andhere mein uski mehak mujhe tarrpati hai

zindagi ke jo saal us ne mere saath basar kiye

woh meri yaadon mein ab bhi tar o taaza hain

jab koi mushkil hoti woh mujhe dilaase deti

barre hoslay se baar baar jeenay ki taraf bulati

meri tanhaaion ki munis, meri ghamkhwar o hamdam thi

dil o jaan per kia guzarti hai wohi thi sirf jaanti

teer apnon ke lagay ya ghairon ke wohi marham rakhti thi

har baar zakham dho ker woh meri masihaai kerti thi

waqt barra zaalim hai,chali gaye ik roz woh apna ghar basaney

tanha mujhe chorr ker, hosla de ker apni zindagi bananey

ab mein hoon aur meri tanhaaiyan jo mujh ko dasti hain

yaad mein uski meri aankhen aksar nam rehti hain

yeh aas ke kab woh aaye gi kab mein usko dekhoon gi

kab phone per uski khanakti awaz kanon mein ras ghole gi

milne ki khwahish ko daba ker usko khushion ki dua deti hoon

sada abaad rahe uska chaman phool khilne ki dua deti hoon

10th october,2010

 

 

 

 

NAZM: ‘ NAYA BAAB ‘

Standard

zindagi ka naya baab raqam ker rahi hoon mein

kahan shroo kahan khatam, qalam ker rahi hoon mein

beetay dinon ki yaaden aur haal ka fasana

suna chuki jo pehle khatam ker rahi hoon mein

chal diya bhula ker jeeney ki saath qasmein

bewafai per uski aankh nam ker rahi hoon mein

na poocha kisi ne murr ker, kia haal hai tumhara

bey niazion ko jazbe chasm ker rahi hoon mein

waqt beeta, pani guzra, baith gayee reit

jo hua so hua, kioon gham ker rahi hoon mein

seencha hai jinko mein ne khoon e jigar se apne

nazar na lagay kisi ki waham ker rahi hoon mein

taqdeer ke likhay ko koi mita nahi sakta

Rab ke is dastoor ko faham ker rahi hoon mein

zindagi ka naya baab raqam ker rahi hoon mein

kahan shroo kahan khatam qalam ker rahi hoon mein

15th november,2010

NAZM…..’ BARISH ‘

Standard

bahar ka mausam tha, hawa bhi khushgawar thi

najane kioon phir bhi dil mein barish hui thi

ek lapka tha bijli ka, ankh chaka chond hui

saara alam roshan tha, ankh se barish hui thi

un jaana saa jungle aur sehma wujood dao per

taak taak ker dil per teeron ki barish hui thi

anjaan tha shikari, ghao ki gehrai ka

shikar per lekin khoon ki barish hui thi

ye naata kaisa naata hai khudaya, ke

chot kha ker bhi duaaon ki barish hui thi

11th november,2010

nazm: ‘ shoq ka safar ‘

Standard

mein chali hoon kathin raahon per is tarah

diye shoq ke khialon mein jala ker barson

jalte rahe bujhte rahe khialon ke deep

mujhe dekha kiyye rashk se ehl e jahan barson

waqt ne khawabon ki jo taa’beer wafa ki

jalay hain mujh se khas o khashak barson

nibhata kon rasm e hamsafri is jeevan mein

raasta hi rokte rahe dar o deevar barson

kitna kathin tha mere shoq ka ye safar

karain ge aabla pa se maseeha andaza barson

30th october,2010

azad nazm

Standard

tanha apne kamre mein

mein qalam le ker baithee hoon

safha e qirtaas per lekin

lafz ban ban ker bigarrte hain

kahazon ke golay

mere darmanda khialon ki manind

muntashir ho ker

idhar udhar phail rahe hain

kaash mein ek shaira hoti

ya dil ko choo lene wali adeeba

lekin mein kuch bhi nahi hoon

sachchaion se darti

riwajon ke pehre mein

apni hi sochon mein qeid

darwaza khulne ki muntazir hoon.

18th october,2010